هذه القصيدة تغنى بها الشاعر وليد الرملي في مدينته بنغازي، من فرنسا موطن هجرته.
نشرت في صفحة - جيل ليبيا
بنغازي - استمع
سلامي عليك بنغازي
يا حب قلبي يا وطا الأعزازي
يا الجميله
اللي بيك عقلي وهنوته ودليله
طيفك ايزور ف نومتي كل ليله
يطرب احلامي ايودها بأعجازي
ايحيد الحزن والكرب عني ايشيله
ويبقى ايناجي في هواي ايزازي
يقرب مناهل خاطري ويحكيله
ويشرح مقاصد ف الصدر بأيعازي
يسعد منامي في اوقات جميله
تمنيت نومي ايدوم لا قفّازي
يا الحنونه
يا اعجاز ربي في خلايق كونه
سمحه وجمالك حلو باهي لونه
وكل سمح جاور طينتك منحازي
ارقيتي وسكنتي علو مانك دونه
ابقيتي صقر في هامته ركّازي
مانك احدا لابوم لا حبرونه
انتي كما في الطير رانك بازي
ياما عليك اعداء ذاقو الهونه
فاشست ذلو وانقليزي ونازي
ليك سلامي
يا وطن غالي لوعتي به رامي
يا نشوتي يا منيتي وغرامي
يحميك ربي من ظليم وهازي
يحميك يا شوف الوليف السامي
يا نبض طيب ف القلب هزازي
يا روح حلوه عشقها دوّامي
الها نغم حالي موعطب نشّازي
تنعش اسبابي اترفها حوّامي
اتخلي كياني بفرحته نقّازي
سلام تحيه
من وسط قلبي ليك موش اشويه
يانور ضاوي ف الوطا جمليه
ضيك تمادى اوصل ف الحجازي
وخطّّم علي الأردن وفي تركيه
وفي إيران شكّع في جبل الأهوازي
وفات حتى القاره الهنديه
اتقول مد نافع كيف علم الرازي
وحتى العلم احذاك ما يجي شيه
لو خيروني ما خطاك انوازي
كتبها ( ليبيا ... نغماً في خاطري ) في 02:49 مساءً ::
علي الحلال رائع انت والقصيدة والي قالها
الأخ الكريم - عوض السعيطي . مرحباً بكم و لقد أعجبني تعليقكم جدا ... و الشكر لله أولاً ثم للأخ الشاعر الذي ذكرنا بحبيبتنا بنغازي
فعلا رائع أنت ورائع الشاعر وليد الرملي ورائعون كل من كانت بنغازي في قلوبهم.
الأخ الكوافي : لقد شرفتم مدونتكم ( ليبيا نغماً في خاطري ) نعم أخي الفاضل .من كانت بنغازي في قلبه فلن يتنكر لأهلها الطيبيين أبداً .. و التحية للأخ الشاعر وليد الرملي .
شكرا لصاحب المدونة على ختياره الدقيق للقصائد
أهل بنغازي ويا بنــغازي
من ذا يكافئ فعلك ويجازى
بعض المدائن أهلها وفعالـهم
في القلب يشبه مثقب الخراز
لكن اهلك في الجراح بلاسم
وطــرازهم في الناس أي طراز
هذه الكلمات للشاعر حسن السوسي رحمه الله
شكرا لك يا خونا صلاح وبنغازي ولاده وبنغازي هي
خاصرة ليبيا الثقافيه وبنغازي ببحرها الحاني تغرس
في ابناءها حبها حتى ولو كانوا في آخر العالم
فلك التحية ولكل مدن ليبيا الحبيبه
ولبنغازي الأم الحنون والصدر الدافي كل التحايا
وكل زهور البساتين ولها أهتف اني احبك بنغازي
عزيزي الغالي / سعيد ..أسعد الله صباحك و مساءك بكل خير و حب و سعادة و هناء و سرور و حبور و رضا ... يا بن حاضتنا و مربيتنا و التي أكرمت مثوانا وبسطت لنا أرضها فكانت لنا بساطا ..و أغدقت علينا من نسيمها ..فكان لنا نفساً و هواءا.. و أطعمتنا من ثمارها.. فغذت بها أجسامنا .. و شملتنا بأمنها و أمانها ..فراقت لعقولنا مطالعة ما حوته مكتباتها من نتاج فكر أبنائها .. فتوسعت بذلك مداركنا ... يا ابن أمي الحنون العطوف ..لنعم الأخ أنت الوفي لأمك ..و لنعم الأم تلكم الأم.
أخوك في الأم / صلاح عبد العزيز
شكرا للأستاذ ليبيا نغما في خاطري واتمنى لكم ولمدينتكم الرقي والشموخ ابد الدهر
ماشاء الله شعر غاية في الروعة واختيار افضل من استاذ رائع مثلك
الأستاذان المحترمان / سالم العليي و سالم العقوري .
أشكر لكم زيارتكم المباركةو إعجابكم بهذا المجهود المتواضع . لا تبخلوا عني بنصائحكم.
